Gipadakop ug gipapriso sa usa ka asawa ang iyang bana nga security guard nga nasakpan sa akto nga nakigpuyo og teenager sulod mismo sa ilang panimalay sa barangay Saavedra, lungsod sa Moalboal, Cebu.
Ang gipadakop sa asawa mao si Joe (tinuod nga ngalan gipugngan), 27, ug ang gikapuyo niining teenager nga si Jelyn (tinuod nga ngalan gipugngan), 19, ug lumad nga taga Sinakaban, Misamis Oriental.
Si Romella (tinuod nga ngalan gipugngan), nagtrabaho isip pharmacy attendant sa Negros Oriental, giubanan pa sa ginikanan ni Joe aron isumbong sa kapolisan ang gihimo sa iyang bana nga nakigpuyo sa hinigugma niining teenager nga si Jelyn.
Si Insp. Rolly Lauron, hepe sa Moalboal Police Station, miasoy sa Banat News nga sa inisyal nilang imbestigasyon, nasayran nga si Joe nananghid kang Romella nga manarbaho isip guwardiya sa Manila ug misugot ang asawa.
Paglabay sa walo ka bulan, mipauli si Joe sa Moalboal. Sugod niadto, sumala pa ni Insp. Lauron nga wala na magpadala og kuwarta si Joe ngadto kang Romella ug sa 2-anyos nilang anak babaye.
Sumala pa ni Insp. Lauron nga napugos si Romella nga manarbaho ug nadawat isip pharmacy attendant sa Negros Oriental.
Apan sa pagpauli og balik ni Joe sa Moalboal, gidala na niini ang iyang hinigugma nga si Jelyn, ilabi na nga wala diha ang iyang asawa nga si Romella.
Ang mga ginikanan ug mga igsuon ni Joe nga na-insulto sa gibuhat ni Joe nga gipapuyo niini sa panimalay sa magtiayon ang hinigugma niini nga si Jelyn, misumbong sila kang Romella.
Nagdalidali og pauli si Romella niadtong miaging semana ug nakonpirmar niini nga lain na nga babaye ang gipuyo sa iyang bana sulod sa ilang pinuy-anan. Iya kining gipalayas, apan wala mopatuo si Joe. Nagpauban si Romella sa mga ugangan niini ug midangop sa kapolisan niadtong Lunes.
Miresponde si Insp. Lauron ug mga kaubanan ug naabtan nila silang Joe ug hinigugmang si Jelyn nga maoy nangabli sa pultahan sa ilang pag-abot.
Matud ni Insp. Lauron nga giandam unta nila ang kasong concubinage batok ni Joe ug ipasaka unta niadtong Lunes, apan wala kini mahinayon human nagpakiluoy si Joe kang Romella nga pasayluon kini kinsa mipasaylo usab niini dala ang kondisyon nga ibaligya na lang nila ang ilang balay ug mag-iyahay na sila sa pagpuyo.
Apil sa gipasaylo ni Romella ang hinigugma ni Joe nga si Jelyn ubos sa pasalig nga putlon na niini ang ilang relasyon.
Si Jelyn, atol sa pagsukitsukit ni Insp. Lauron, miangkon nga nailad siya ni Joe sa ilang panagkita sa Manila samtang nagtrabaho kini isip factory worker sa dihang gipasaligan kini nga dugay na silang nagkabulag sa iyang asawa hinungdan nga mikuyog kini dinhi sa Sugbo.
Human gi-release sa kapolisan, si Jelyn mipasalig nga mouli na lamang sa ila sa Misamis Oriental.