Misis gipatay sa paralitikong mister

Patay nang miabot sa tambalanan ang usa ka asawa human gidunggab sa iyang paralitikong bana didto sa sitio Mahayahay, barangay Bankal, dakbayan sa Lapulapu kagahapon sa buntag.

Ang asawa mao si Rosalina Cosep, 40, ug residente sa maong dapit, samtang ang midunggab kaniya mao ra usab ang iyang bana nga si Santos Cosep, 50, nag-antos sa pagka-paralize sa katunga sa iyang lawas.

Base sa pasiunang imbestigasyon ni SPO1 William Homoc sa Homicide Section nasayran base sa pamahayag ni Santos nga kagahapon sa kaadlawon milakaw ang iyang asawa ug buntag na kining miuli.
Sa dihang nagkita ang duha mga alas 7:30 kagahapon sa buntag giunhan og kasaba ni Rosalina si Santos ug gibunalan og silhig gumikan kay matud pa nanabi kini sa igsuon nga magsige lang og dula og tong-its si Rosalina ug mabuntagan kini og uli.

Apan kining tanan gipanghimakak ni Santos ug agi og paglikay sa kagubot milakaw kini bisan nagsangkiig gumikan sa iyang sakit mipahungaw kini sa panimalay sa iyang igsuon.

Mga alas 8:30 sa susamang adlaw nakahukom si Santos nga mopauli sa ilang panimalay sa pamasin nga wala na sapota si Rosalina, apan sa pag-abot pa lang niini sa ilang pultahan gipalayas na hinuon kini ug giinsulto nga bakol ug wala nay kapuslanan.

Gumikan sa maong mga pulong nga giluwatan ni Rosalina mingitngit ang palibot ni Santos ug mao na lang ang iyang nasuta nga miadto kini sa kusina ug mikuha og kutsilyo ug sa pagsaka niini gikalitan og dunggab si Rosalina sa likod nga bahin.

Si Rosalina nga samaran nakadagan pa sa gawas sa ilang panimalay ug gitabang sa mga silingan ug gidala sa Lapulapu District Hospital apan gideklarar kini nga dead on arrival.

Samtang si Santos nasikop sa kapolisan ug pasakaan kini og kasong parricide.