‘Reyes resign:’ Bayan Muna

Gidemanda sa militanting pundok nga Bayan Muna ang pagpa-resign ni Energy Secretary Angelo Reyes human ilang gihulagway nga inutil ug walay gihimo ang maong ahensiya aron mamonitor ug kapugngan ang hapit wala nay hunong nga umento sa presyo sa produktong petrolyo.

Mao kini sentro sa pipila ka mga demanda sa Bayan Muna Central Visayas atol sa ilang gilusad nga lihok protesta atubangan sa buhatan sa Department of Energy (DOE-7) sa may dalan Osmeña Boulevard alas 10 sa buntag kagahapon.

Matud ni Jaime Paglinawan, chairman sa Bayan Muna Central Visayas nga maoy nangulo sa gibanabanang 50 ka mga militanting pundok nga mipahigayon og protesta nga walay mga lakang nga gihimo si Reyes aron unta kapugngan ang pagsige og saka sa presyo sa produktong petrolyo.

Labaw sa tanan gi-akusahan usab nila si Reyes nga wala magpakabana pagpangita og paagi aron matangtang ang 12 porsiyento nga EVAT nga maoy usa sa hinungdan sa nakapasaka sa presyo sa produktong petrolyo ug ingon man ang pagtangtang sa Oil Deregulation Law.

Nunot niini gipahibalo ni Paglinawan ang paglusad nila sa signature campaign nga mag-target pagkuha og dili mominos 100 ka libo ka mga pirma nga magsuporta sa ilang gidemanda nga pagtangtang na sa EVAT sa produktong petrolyo ug ang pagbasura sa maong balaod.

Matud ni Paglinawan human unya sila makahipos sa maong gidaghanon sa mga pirma iduso nila kini ngadto sa mga party-list representative aron matuki sa hawanan sa Kongreso.

Sa punto nga pagpatuman og P1.50 nga rollback sa presyo sa diesel sugod niadtong milabay’ng tungang gabii tungod sa panawagan ni Presidente Gloria Arroyo ngadto sa mga oil companies, igo lang kining gihulagway sa Bayan Muna nga moro moro kon pagpanglingla sa katawhan aron mohumot og balik si Arroyo sa publiko ilabina kay nagkaduol na ang State of The Nation Address (SONA) niini sa Hulyo  28.