Traysikol sa Lapu di pa mopa-omento

Mga drayber sa traysikol sa dakbayan sa Lapulapu wala mohinayon pagsumiter sa ilang bag-ong petisyon pagpausbaw sa pletihan bisan pa sa padayong pagmahal sa produktong petrolyo.

Matud pa ni Lapulapu City Tricycle Operators and Drivers Association Federation President Felix Gella nga nahinabi sa Banat News kini gumikan kay bag-o pa nila giimplementar niadtong Pebrero ning tuiga ang daan nilang usbaw sa pletihan niadtong tuig 2006 nga wala nila maimplementar.

Ang konseho sa dakbayan  mitugot kaniadto sa City Ordinance #376-2006 nga nagtugot sa maong kapunongan sa pag-implementar sa   dugang piso sa pletihan gikan sa P6 ngadto na sa P7 sa matag upat ka kilometros. 

 Hinoon si Gella mipadayag nga seryosohon unta sa kagamhanang lokal sa dakbayan sa Lapulapu ang pagmonitor sa mga traysikol nga nangolekta og susamang pletihan nga wala makakuha sa ilang taripa gikan sa city hall.

 Gani matod pa ni Atty. Joseph Vincent Lim ang City Legal officer sa dakbayan sa Lapulapu mipahibalo ngadto ni Gella nga aduna pay mga libo kapin ka mga traysikol drivers ug owners ang wala  pa makakuha sa maong taripa.

 Samtang si Konsehal Junard “Ahong” Chan nga maoy Chairman sa Committee on Transportation sa konseho sa dakbayan sa Lapulapu mipadayag nga nagpaabot nalang siya sa maong suwat hangyo sa mga kadagkuan sa LACTODA. 

Matud pa ni Chan nga nakasabot siya sa sitwasyon sa mga drivers gumikan sa nagkamahal na nga presyo sa petrolyo ug naapektahan usab ang presyo sa palaliton.