Usa ka sakop sa kapolisan gisulod sa giabangan niining panimalay sa sitio Tribunal, barangay Centro, dakbayan sa Mandaue ug suwerte lang kay wala maigo ug nakabalos usab sa pagpusil apan wala usab makaigo.
Ang biktima mao si PO1 Romeo Goloceno, 26, ug sakop sa Field Training Police (FTP) nga gidestino sa Mandaue City Police Office sa City Mobile Group.
Si PO2 Arthur Cuyos nga nahinabi sa BANAT News miingon nga natulog si PO1 Goloceno sa dihang nahigmata sa nabati nga kasikas gawas sa gipuy-an niining panimalay.
Nagdali kini sa pagbangon sa pagsusi sa kasikas sa gawas apan kalit kining gipusil sa makaduha ka higayon ug suwerte lang nga dali kining nakapasalipod ug wala maigo.
Nakahigayon sa pagbalos og pusil si PO1 Goloceno ug ang wala mailhing lalaki nga wala usab maigo ang dali nga nakasibat pahilayo sa maong dapit.
Sa crime scene maoy ilang napunitan ang duha ka mga kabhang sa kalibre .45 nga armas nga ilang gituohang gikan sa wala pa mailhing lalaki nga nagpusil kang PO1 Goloceno.
Si PO2 Cuyos miingon nga si PO1 Goloceno maoy nakasikop kang Darrel Navares, taga sitio Tribunal sa barangay Centro kinsa nag-atubang og kaso nga pagpamun-og,
Dugang pa ni Cuyos nga si Navares ang nagtingkagol karon sa Centro Police Station.