Gasolinahan may tikas

Gitinguha ni Cebu City Councilor Edgardo Labella nga mohimo og kinalit nga inspeksyon sa mga gasoline station sa siyudad tungod usab sa walay hunong nga pagsaka sa presyo sa mga produktong petrolyo nga gipatuman sa mga kompanya sa lana sa nasod.

Tumong ni Labella mao ang pagsiguro sa mga konsumidor nga nahatag kanila ang igong gidaghanon sa ilang gipalit nga fuel tungod sa mga nadawat niyang report nga dunay pipila ka mga refueling station sa dakbayan nga mga tikasan.

“It has been brought to the attention of the City Government of Cebu that there are some retailing stations allegedly using defective gasoline dispensing pump machines,” matud ni Labella.

Ang City Treasurer’s Office (CTO) maoy giawhag sa konsehal nga maoy mohimo niini partikular na sa calibration sa mga pumps.   

Gikinahanglan hinuong kuyog sa CTO ang Department of Energy (DOE-7) alang sa maong katuyuan.

“While vigilance and alertness are demanded of a consumer in every commercial transaction, still, it behooves upon the concerned government agencies to protect consumers,” sumala ni Labella. Ubos sa City Ordinance 69 o ang Omnibus Tax Ordinance, ang CTO mahimong mohimo og random inspections sa mga establisamento lakip na sa mga gasoline stations.

Ang konsehal gikatakdang mopalabang og resolusyon niini karong Miyerkules.

Nasayran nga P3 ang giumento sa presyo  sa lana aron kuno pagbawi sa mga kompanya sa lana sa ilang alkanse sa milabay'ng mga buwan.

Hinuon ang Petron ug Shell mipasalig sa Malakanyang pagpatuman og P1.50 nga price rollback sa matag litro sa krudo tungod sa hangyo ni Presidente Gloria Macapagal Arroyo.