'Kawatan' bulilyaso kulatahan

Nalandig sa tambalanan ang usa ka notadong sakop sa “akyat bahay gang” human kini mamat-i ug masakpi sa tag-iya sa balay nga iyaha untang gilungkab nga miresulta sa ilang pagsinukmagay sa Luray Uno barangay Poblacion siyudad sa Toledo niadtong Sabado sa alas 2:50 sa kaadlawon.

Ang gipasanginlang kawatan nakaangkon usab og mga samad dinunggaban ug bun-og mao si Ricky Dacuyan Alyas Ricky Boy, 24 , molupyo sa Lawis Luray-II sa maong siyudad.

Samtang ang tag-iya sa balay mao ang magtiayon nga Vicente Pabroa Sr., 44 ug Angelina Pabroa, 42.

Ang suspek misekreto og sulod sa balay diha agi sa kusina pinaagi sa pagguba sa kawayan nga bungbong ug gikuha ang itom nga traveling bag nga dunay sulod nga kwarta nga P1,280 ug uban pang importanteng butang nga gibutang sa altar samtang nahinanok pagpangatulog ang mga tagtungod.

Apan sa dayon na niining gawas nakamata si Vicente ug gihamag ang suspek ug giilog ang bag ug nahitabo dayon ang binayloay sa kumo tali sa duha.

Nabantayan ni Pabroa nga miibot sa giloklok nga kutsilyo ang suspek ug dayong dunggab kaniya apan nasagang niya kini ug mga samad ra sa bukton ang iyang naangkon.

Naatlan usab nga nakamata ang anak sa magtiayong si Vicente Jr. ug gihapsan og kahoy ang suspek hangtud nga nadis-armahan kini.

Wala pa gyud mahunong ang karambola hangtud nga nangabot nalang sila si  PO3 Lorenzo Gutang ug PO1 Dante Hiloig ug mao nay mipahunong kanila ug parehong gipanghatud sa Toledo District hospital.