Mag-uuma nagkawil na ang liog

Nagkawilkawil nalang og hapit na gyud maputol ang ulo sa usa ka mag-uuma ug natagodtagod usab sa samad tinigbasan agi sa sundang ang dughan ug ubang bahin sa lawas sa dihang giatngan kini sa nagbinugtong nga suspek samtang gikan nga nananggi sa mga tinanom niining mais didto sa barangay Anonang Sur, siyudad sa Bogo niadtong Sabado sa alas 6 sa gabii.

Ang biktima mao si Uldarico Dignos Ruiz,  61,  molupyo sa nahisgutang lugar samtang ang suspek mao ra usab ang iyang silingan nga si Glicerio Talisic.

Matud ni PO3 Allan Dosdos, imbestigador sa Bogo City Police Station dihang nahinabi sa Banat News subay sa inisyal niining imbestigasyon usa ka samad tinigbasan ang naangkon sa biktima sa tangkogo nga bahin nga miresulta sa hapit pagkaputol sa iyang ulo ug mituay na kini og hapit panit na lang ang naggunit niini.

Samtang laing tulo ka samad tinigbasan sa sundang ang na-angkon sa dughan sa biktima, laing samad sa iyang abaga apan dili kaayo lawom ug laing samad sa walang bahin sa bukton nga gituohan nga pagpanagang kini sa biktima.

Subay sa inisyal nga imbestigasyon ni PO3 Dosdos gikan sa mga molupyo sa maong lugar dugaydugay nang nagkadeperensiya ang biktima ug ang suspek human nagduda ang biktima nga si Uldarico nga dunay relasyon ang suspek ngadto sa iyang asawa.

Nasuta   nga gisugat sa suspek ang biktima nga gikan  nananggi sa iyang mga tinanom nga mais kauban ang asawa niini ug gideretso kini pagtigbas.

Matud sa mga nakasaksi nakadagan pa unta ang biktima apan gigukod kini og gisigihan og tigbas sa bitbit niining hait nga sundang hangtod nga natumba sa dalan ug matud ni PO3 Dosdos nag-ubo na kini sa dalan sa ilang paghiabot og nagkawilkawil na ang ulo niini nga hapit maputol sa tinigbasan.

Sa paghimo ning balita nagpadayon pa ang hot pursuit operation sa kapolisan sa suspek nga daling misibat human sa hitabo nga gidudahang didto mopaingon sa lungsod sa San Remegio.

Karong buntag matud ni PO3 Dosdos ipasaka nila ang kasong murder batok sa suspek.