AGI Inspector surpresahon sa CCPO

Surpresahon sa Cebu City Police Office ang mga inspectors sa Annual General Inspection sa rehiyon nga buhatan ug ingon gikan sa Camp Crame sa ilang tulo ka inisyatibang gihimo.

Sumala pa ni Sr. Supt. Patrocinio Comendador, director sa CCPO gipangandaman og maayo sa dakbayan ang AGI ug gikurihian na nila ang ilang mga sayop kaniadto.

Gipangusgan ug operational na ang CCPO- Medical Response Team, Electronic Blotter kun e-blotter ug ang Crime of the Scene Investigation Section.

Ang CCPO-Medical Response Team gitukod aron makatabang panahon sa katalagman ug gilangkuban sa mga polis nga mitapos og kursong may kalambigitan sa medical courses.

Samtang ang kaniadto kutob lang sa lungkab ug robbery nga crime scene moresponde nga CCPO crime lab gihimo na karong full-time Crime Scene Investigation Section (CSIS) nga mokuyog na sa ilang silingang unit nga Homicide Section sa pagresponde.

Sila na karon ang mokuha sa mga physical evidence diha sa crime scene tungod kay kaniadto ang regional Soco maoy moresponde ug usahay dugay pang maabot maong maguba na gyud ang crime scene.

Ang ikatulong inisyatiba mao ang pag-operate og e-blotter nga mogamit na og computer ang mga police station nga konektado pinaagi sa local area network (LAN) connection.

Ang tanang data nga ibutang sa ilang mga computers mahimong makuha dayon sa usa ka pamilok sa operations section diha sa Camp Sotero Cabahug.

Gipadayag niini nga ila na gayud nga gibutang sa huna-huna nga makuha gihapon ang pasidungog nga ilang naangkon sa miaging tuig nga maoy Best Police Office sa rehiyon siete ug tinguhaong mamahimong Best Police Office sa tibuok nasud.