Nasunogan sa Paknaan gitabangan sa Kapitolyo

Gipadad-an og hinabang sa buhatan sa Cebu Provincial Social Welfare and Development Office   ang 39 ka pamilya sa Zone Kamunggay sa barangay Paknaan, dakbayan sa Mandaue nga mga biktima sa sunog  niadtong miaging adlaw.

Si Marivic Garces, social welfare chief sa kagamhanan sa lalawigan nga nahinabi sa Banat News   mipadayag  nga naglakip sa mga nag-unang hinabang nga gipadala sa ilang buhatan mao ang mga pagkaon nga naglakip sa linata nga sud-an, noodles ug  uban pa.

Si Garces miingon nga ilang giseguro sa pagkuha ang mga pangalan sa mga biktima  nga  makadawat sa hinabang nga kadto lamang tinuod nga biktima sa sunog.

Kini ilang gihimo alang sa paglikay nga masubli pa nilang masinati nga lakip sa dili mga biktima sa sunog   moapil sa paglinya alang sa pagpangayo’g hinabang.

Si Garces miingon nga si  Gobernador Gwendolyn Garcia  naghatag na og “go signal” sa ilang buhatan alang sa paghatag og dinaliang hinabang alang sa mga biktima nga naglakip sa mga  housing materials nga magamit sa pagpatukod og balik sa ilang mga panimalay.