Hubog gipatay

Giatngan ug gipusil patay ang usa ka mag-uuma nga naglakaw pauli gikan nga nakig-inom sa iyang mga barkada sa bukirang bahin sa barangay Lindogon lungsod sa Sibonga niadtong Miyerkules sa alas 8:30 sa gabii.

Ang biktima mao si Felix Artiaga, 40, molupyo sa nahisgutang lugar samtang duna nay lead ang kapulisan sa suspek nga nagpuyo ra usab sa maong lugar.

Matud ni PO2 Niño Ibo, imbestigador sa Sibonga Police dihang nahinabi sa Banat News subay sa inisyal nga imbestigasyon hubog  nga nipauli ang biktima apan giatangan kini sa suspek diha sa dalan ug gipusil duha ka higayon.

Duha ka samad pinusilan ang naangkon sa biktima diha sa iyang bukobuko ug laing samad pinusilan sa liog nga hinungdan sa kamatayon niini.

Subay sa inisyal nga impormasyon nga nahipos sa kapulisan atraso ang posibleng motibo tungod kay gikatahong dunay gikaaway ug gikasukmagay sa milabay nang mga adlaw ang biktima.