Gamay nalang ang nagpa DNA

Nagkagamay na ang kabanay sa mga biktima sa nalunod nga M/V Princess of the Stars nga nagpakuha og blood stain sample alang sa DNA test.

Kini maoy naobserbahan sa chairman sa Cebu City Disaster Coordinating Council (CCDCC) nga si Konsehal Gerardo Carillo ug nanawagan ngadto sa tagtungod sa mga biktima nga moadto sa action center diha sa Cebu City Sports Complex.

Partikular na niadtong kabanay nga wala pa kakuhai og blood sample ang pagpunsisok niini sa ilang gihatag nga deadline.

Ang action center giingong mo-accommodate og labing minos 300 ka tagtungod matag adlaw alang sa pagkuha og blood sample apan naobserbahan nga kapin na lang sa 70 ka tagtungod ang nagpakuha og blood sample sa miaging adlaw.

Karong Biyernes na ang gihatag nga tagal pagkuha og sample sa DNA test aron kini mahatod na ngadto sa Bosnia alang sa final analysis.

Matud pang Carillo nga kadtong tagtungod nga mapakyas pagpakuha og blood sample maghuwat pa sa sunod nga batch.

Duna pay gibana-banang kapin sa 400 ka mga lawas nga ugkatunon nga gituuhang naa pa diha sulod sa maong barko.