Miapil na karon sa panawagan ang Cebu City Jail nga pabiyaheon na ang pasaheroang mga barko sa Sulpicio Lines.
Kini tungod kay human malunod ang M/V Princess of the Stars, wala pa mapadala ngadto sa New Bilibid Prisons sa Muntinlupa ang mga insular prisoners niini.
Ang insular prisoner mao kadtong binilanggo nga nahukman nang sad-an sa krimen nga iyang nahimo ug nasentinsyahan og pagkabilanggo nga dili mominos sa unom ka tuig.
Matud ni Deputy Jail Warden Captain Gil Enopia Jr. nga 45 ka mga insular prisoner ang ila untang ipadala ngadto sa Muntinlupa sa hinapos nga bahin sa miaging buwan.
Apan tungod sa pagkalunod sa M/V Princess of the Stars nga maoy ilang suki nga pasakyan sa mga piniriso, naglisud na sila pagpangita og barko nga kasakyan sa mga binilanggo.
Kini human pugngi sa Department of Transportation and Communications (DOTC) pinaagi sa Maritime Industry Authority (MARINA) ang ubang barko sa Sulpicio nga makabiyahe.
Giklaro ni Enopia nga makadaginot sa gasto ang Bureau of Jail Management and Penology (BJMP) kun sa Sulpicio Lines pasakyon ang mga insular prisoners.
“Sa Sulpicio okay kaayo sila kay sa economy ra man mi nila i-accommodate, unya mosugot ra sila kun ang among escort is one is to three, sa Super Ferry man gud one is to one ilang gusto, usa ka gwardiya sa usa ka binilanggo, unya adto sab mi nila sa cabin ipahiluna, so, nanginahanglan gyud ta ug dako nga budget, unya sa Gothong sab, wala may libre sa kaon, unya nagduha-duha pud sila pagpasakay og mga piniriso kay wala pa kuno sila makasuway nga sakyan og mga binilanggo ilang barko,” sumala ni Enopia.
Tungod niini, miapil na si Enopia sa panawagan nga tugotan nang makalawig ang mga de pasaheroang barko sa Sulpicio Lines sa labing dali nga panahon.
Nasayran nga ang mga cargo vessel pa lang sa nahisgutang shipping company ang gitugotang makabiyahe human malunod ang M/V Princess of the Stars.
Gawas kang Enopia pipila na ka sektor nga naglakip sa mga negosyante ang nanawagan sa kagamhanan nga tugotan nang makalawig ang mga passenger ship sa Sulpicio Lines.
Alang kanila, mahimong tugutang makabiyahe ang nahisgotang mga barko nga dili makompromiso ang seguridad sa mga pasahero.