Drayber walay taripa ipareklamo

Gipahibalo sa Land Transportation Office (LTO-7) nga mahimong ireklamo og overcharging kadtong mga   drayber sa PUJ  nga mangolekta sa P8 nga bag-ong minimum nga pletehan kun wala pa makakuha og bag-ong taripa nga  i-display sulod sa sakyanan.

Mao kini  giklaro sa operations chief sa LTO-7 Vicente Gador nunot sa pormal nga pagpatuman sa bag-ong minimum nga pletehan sugod niadtong Lunes.

Hinuon, giklaro ni  Gador nga wala hinuoy problema bisan og mokolekta sa P8 nga bag-ong pletehan bisan og walay taripa basta dili lang moreklamo ang pasahero niini.

Apan sa higayon nga moreklamo ang mga pasahero niini mapugos sila pagpahigayon og hearing aron ipatumbok sa pasahero ang   drayber aron kuhaan sa iyang sentimento may labot sa gibasihan niini pagpatuman sa umento.

Kadtong mga drayber nga mapamatud-ang mikolekta sa bag-ong pletehan nga walay gibasehang taripa pabayron kini og multa nga P500  ug laing P60  nga computer fee ug masuspenso pa ang lisensiya niini gikan sa 15 ka adlaw hangtud sa 30 ka adlaw.

Kagahapong adlawa nagpadayon gihapon ang LTFRB-7 pag-apod-apod sa mga operator sa bag-ong taripa human 20 porsiyento lang sa mga operator og PUJ dinhi sa Sugbo ang nakakuha og bag-ong taripa niadtong Domingo ug nakabayad sa P500  nga bayranan niini.