Pagdaginot gitudlo ngadto sa kabataan

Ang pagtisok kabahin sa pagtulun-an sa pagdaginot ug pagtigom  gihingusgan karon nga masagop sa kabataan nga nagtungha sa elementarya sa dakbayan sa Lapulapu ug dakbayan sa Mandaue.

Kini maoy programa sa Real Bank’s nationwide ubos sa “Bata, bata, mag-impok magsinop program” nga ilang gisugdan sa paglusad kagahapon sa City Central School sa dakbayan sa Mandaue.

Si Dr. Florencia P. Caballes, school principal sa maong tulunghaan nga nahinabi sa Banat News miingon nga ang maong programa  gitambungan sa mga tinun-an ug mga magtutudlo sa dakbayan sa Lapulapu ug dakbayan sa Mandaue.

Ang maong programa nagtudlo sa kabataan kabahin sa pagdaginot ug dili pag-usik-usik ug bisan unsang mga butang sama sa paggasto-gasto sa ilang mga balon ug kini gamiton lang alang sa ilang mga gikinahanglan.

Gitudlo usab ngadto sa kabataan sa elementarya ang pagdaginot bisan sa ilang mga papel, notebook, lapis ug ballpen.

Si Caballes miingon nga gidasig sa mga representante sa nagpasiugda ang kabataan sa pagtigom ug andam ang mga tagdumala sa maong bangko pagdawat sa ginagmay’ng salapi sa kabataan kung buot nila kining ideposito.

Tungod sa moderno karong panahon daghan nang kabataan ang wala na matudloi kabahin sa pagdaginot ug nahimo na usab silang gastador ilabi na diha sa mga internet cafés nga nagpaduwa og mga on line ug off line games.