Gibunalan og kahoy sa ulo, patay sa ospital

Nakabsan  sa iyang kinabuhi kagahapon sa alas 3:30 sa kaadlawon sulod sa Vicente Sotto Memorial Medical Center   ang 20-anyos nga lalaki human bunalig kahoy sa iyang ig-agaw   niadtong  Biyernes didto sa barangay Poblacion, lungsod sa Alegria.

Nabugtoan sa kinabuhi si Julius Glinogo, nagpuyo sa nahisgutang lugar human gi-report sa amahan niini nga wala na makaagwanta human mabunali niadtong petsa 11.

Usa ka Alsabar Palao 19 anyos ig-agaw sa biktima nga usa ka Muslim maoy gitumbok nga responsable sa maong pagbunal sa ulo niini ginamit ang usa ka kahoy.

Si SPO2 Faustino Filipinas sa Alegria Police Station nga nahinabi sa Banat News nagkanayon nga ang biktima kinsa suloguon sa iyang ig-agaw nga Muslim kalit lang kining gibunalan diha sa gawas sa ilang panimalay sa dihang naabot kini gikan sa lungsod sa Badian nga nangaligo sa Matutinao.

“Alegasyon didto kahoy kuno nga dos-por-dos allegedly pero wala man sab mi makakita niini kay gilabay man wala makit-i”,  sumala pa ni SPO2 Filipinas.

Matud pa niini nga si Palao dili kini  bayolenting  pagkatawo ug gani nahibulong sila nga nakahimo sa pagpamunal sa iyang ig-agaw nga katabang sa panimalay.