Puya gilabay sa CR

Usa ka puyang lalake nga gibanabanang 7  ngadto sa 8 ka buwan ang napalgang gisulod sa inudoro sa kasilyas sa usa ka balay diha sa Sitio Arco, barangay Punta Princesa ning dakbayan, niadtong Biyernes sa gabii.

Ang kapolisan nagkanayon nga  ginganlan og Michael Lesundra maoy nakakita sa maong puya ug maoy mitaho kanila.

Gibutyag ni Lesundra sa kapolisan nga mitubag siya sa sugo sa lawas niadtong higayona apan pagsulod niya sa pansayan sa apartment nga ilang gipuy-an, puwerting kurata niya dihang nakita niya ang daghang dugo sa inudoro.

Dihang iyang gisusi, nakita niya ang usa ka puya nga wala pa mahulog ngadto sa ilawom sa tangke sa pansayan ug gipahibawo dayon niya ang iyang asawa nga si Cristita kinsa maoy dali nga nakapanawag sa kapolisan sa Homicide Section sa Cebu City Police Office.

Nasayran sa kapolisan nga ang maong kasilyas kanunay kining ngitngit kay wala tauri og  suga ug gani wala usab kini kandado hinungdan nga bisan kinsa lay mosulod.