P1.50 umento sa krudo ug gas

Sugod kagahapon gipaumentohan na usab og P1.50 matag litro ang mga produkto sa diesel ug kerosene gas.

Si Roberto Kanapi, tigpamaba sa Shell nagkanayon nga ang pagpasaka sa prisyo sa maong  mga produkto gipahiuyon sa misaka usab pag-ayo nga presyo niini sa merkado sa tibuok kalibutan.

Midugang siya nga ang wala nila hisayri mao ang bahin sa presyo sa gasoline kun dili ba usab mosaka  human kini tibhangi og P1 matag litro niadtong Miyerkules.

Ang mga negosyante sa maong industriya nagduhaduha sa pagtandog  sa presyo sa gasolina sa kalabaka nga mapasanginlan silang mimaniubra niini kay bag-o pa kining  gipakunhoran.

Ang umento  nga mi-epekto kagahapon maoy ika-19 ka higayon sa sinemanang pagsaka sa presyo sa mga produkto sa petrolyo dinhi sa nasud.

Sa laing bahin nakapakurat kining maong kaugmaran sa taga-Department of Energy (DOE) tungod kay walay mga kompaniya sa asayte nga misumiter og notisya bahin sa maong pag-umento sa presyo sa kerosene ug diesel.

Sumala ni Director Zenaida Monsada  sa Oil Management Bureau sa DOE nga manghinaot lang sila nga dili unta dayon moduyog sa pag-umento ang presyo sa mga produkto sa gasolina.

Midugang siya  nga ang gobiyerno magpaabot nalang sa mga pahibawo sa mga kompaniya sa asayte bahin sa mga kausaban sa prisyo  niini nga ilang ipatuman sa nasud.