Abogado mihulga sa brgy. kagawad

Abogado sa pamilyang Restauro ang gipasanginlang nanghulgang mokulata sa molingkuray untang konsehal sa barangay San Isidro, dakbayan sa Talisay.

Ang maong insidente nahitabo niadtong Biyernes sa buntag diha sa barangay hall sa nahisgutang lugar.

Si Wilfredo Bongato ang kanhi kandidato sa pagkakonsehal sa San Isidro niadtong milabay’ng tuig  nagpa-blotter sa kapolisan sa barangay Poblacion batok kang Atty. George Bragat.

Kahinumduman nga si Bongato ang miduso og petisyon ngadto sa Comelec tungod kay base sa iyang pakisusi sa canvassing sa mga balota adunay sipyat ang mga canvassers diin nasuta nga midaog siya isip konsehal sa eleksiyon sa barangay sa milabay’ng tuig.

Ang biktima uban kang Corazon Moran, Comelec registrar sa Talisay ug Bertilio Pasilang officer in charge (OIC) sa Department of Interior and Local Government (DILG) sa siyudad ang mianha sa barangay hall aron unta palingkuron si Bongato sa puwesto.

Si Bongato mipasangil nga si Bragat kinsa diha niadtong higayona sa barangay hall mibabag kanila ug nagkanayon nga ang iyang “motion for reconsideration” nagpabilin pa kining pending sa korte hinungdan nga nahitabo ang panaglalis sa duha.

Si Bongato mipasangil nga si Bragat mibahad ngadto kaniya sa pag-ingon “kulatahon tika bisa’g taga San Isidro pa ka!”

Sa kahadlok ni Bongato dali kining miadto sa Talisay City police station ug nagpa-blotter sa maong hitabo.

Ang Banat News mitawag kagahapon sa hapon sa telepono sa balay ni Bragat aron makuhaan kini og pamahayag kabahin sa mga pasangil batok kaniya apan matud sa asawa niining si Elsie milakaw ang iyang bana.