Giawhag karon ni Cebu City Councilor Arsenio Pacaña ang kongreso nga paminawon na ang panawagan sa katawhan nunot sa padayong pagsaka sa presyo sa lana.
Buot sa konsehal nga i-review na sa kongreso ang pagpahamtang og Value Added Tax (VAT) sa mga produktong petrolyo ingon man ang Oil Deregulation Law.
Nabalaka si Pacaña nga ang gihimong counter-measure plan sa gobiyerno labot sa nasinati karong energy crisis sa nasud pahimuslan sa uban.
Ang gobiyerno migahin na ug P4 bilyones alang sa subsidies sa mga electricity user, pautang sa mga tinun-an ug sa mga nanag-iya og pampublikong sakyanan.
Partikular na niini alang sa pagpa-convert sa mga bus, taxi ug jeepney owner sa ilang mga unit ngadto na sa LPG ug compressed natural gas.
Gidayeg ni Konsehal Pacaña ang maong lakang sa gobiyerno tungod kay kini giingong makatabang usab sa kabus nga mga Pilipino.
Apan midugang ang konsehal nga mas maayong hatagan usab og pagtagad sa kagamhanan ang singgit sa publiko alang sa tinud-anay nga economic reforms.
Kini ilabi na sa gitawag og “long lasting solutions” sama sa pagtangtang sa VAT sa mga produktong petrolyo ug pag-amindar sa Oil Deregulation Law nga gipaburan ni Pacaña.
Kini tungod usab sa mga pagduda nga himuon lang tinubdan sa korupsyon sa uban ang cash assistance sa gobiyerno ug dili mahatag ngadto sa labing nanginahanglan niini.
“There are apprehensions that government cash assistance or subsidy might be another fertile ground for corruption or go to waste as it may benefit only a few in cities and not reached the poor people and deserving sectors in the provinces,”sumala ni Pacaña.
Sa susamang kalambuan, giawhag usab sa konsehal ang Department of Finance nga muhimo og klarong guidelines sa pag-release sa subsidy.
Kini aron maprotihian ang pundo sa gobiyerno ug mahatag ngadto sa mga sektor nga labing naapektahan sa padayong pagsaka sa presyo sa lana.