Nanerbiyos nakabuhi sa lubi

Patay diha-diha ang usa ka 39-anyos nga lalaki nga giingong  may sakit nga nervous breakdown human kini makabuhi sa habog nga punoan sa lubi nga iyang gisak-an kagahapon sa buntag sa sitio Antonio, barangay Linao, dakbayan sa Talisay.

Si PO2 Harrison Quiñanola sa Homicide Section sa Talisay Police Station miila sa nahagbong nga si Geraldin Manreal, minyo, residente sa maong lugar usa ka trabahador og woodcraft.

Maayong pagkapiyapi sa walang tampihak ni Manreal tungod kay mao kini ang nauna og tugpa diha sa yuta.

Si Quiñanola sa pakighinabi niini sa Banat News kagahapon sa buntag mibutyag nga ang sakit ni Manreal nagsugod niadtong tuig 2003 human kini madunggabi sa iyang gikainom sa dakbayan sa Toledo. Sa maong hitabo si Manreal ang gidala sa Vicente Sotto Memorial Medical Center apan sa pagkamatngon niini og buot midagan kini ug mipasok sa ilawom sa iyang higdaanan sa ospital tungod kay gibati og kahadlok nga dunay tawo nga mopatay kaniya apan nabalik ra usab kini sa iyang saktong panghunahuna.

Niadtong Huwebes sa alas 12:15 sa hapon si Manreal  naghiwa sa iyang pulso ug ang mga igsuon niini ug amahan nakabantay nga miatake na usab ang sakit niini hinungdan nga gialam-alam siya.

Si Armingol, amahan ni Manreal nag-monitor sa lihok sa namatay tungod kay dili na kini normal apan bisan sa unsang alam-alam nga ilang gihimo wala gyud kini mopatuo misaka hinoon kini sa habog kaayong punoan sa lubi pasado alas 4:00 sa hapon niadtong Huwebes.

Ang kapolisan pinangulohan ni  Insp.  Jaime Santillan, mga sakop sa Talisay Rescue Emergency Action Team (TREAT) ug Bureau of Fire Protection ang daling miresponde sa maong hitabo apan wala gyud  sila'y nahimo tungod kay si Manreal ang mihulgang moambak kung moduol ang grupo.

Si Manreal ang mimando usab nga paduolon ang iyang asawa ug nanawag usab kini sa iyang mga paryente nga moduol aron mokanaog siya gikan sa lubi nga iyang gisak-an apan wala kini motuman sa iyang gisulti.

Si Quiñanola midungag nga posibleng tungod sa samad sa pulso ug sa kakapoy na ni Manreal hinungdan nga wala na kini ka kupot  maong nahagbong na hinuon kini kagahapon sa alas 5:30 sa buntag ug demalas kay wala kini matumong ngadto sa mga foam nga gibutang diha tungod sa punoan sa lubi nga iyang gisak-an.