Pusher gitipi kay asin gihatag

Gipusil patay ang usa ka lalaki nga gituohang drug runner human giingong asin ug dili shabu ang iyang gihatag ngadto sa mga suspek nga mipalit kaniya diha sa Bario Baho sa sitio Mahayahay II, dalan A. Lopez sa barangay Labangon niadtong milabay’ng gabii.

Wala na masalbar sa mga mananambal sa Cebu City Medical Center ang biktimang si Jovito “Intsik” Acruz, 27, residente sa maong dapit human kini pusila sa usa sa duha ka namalit og shabu.

Usa lamang ang nailhan sa duha ka suspek sa pangalan nga Gerald alyas Dodong Kulot nga usa ka sulogoon sa usa ka taxi company diha sa maong dapit samtang ang usa padayon pang giila sa kapolisan.

Sa imbestigasyon ni SPO1 Rogelio Nedamo sa Homicide Section ang biktima nga gituuhang drug runner ug lain pang kaubang giilang si Larry Racaza maoy gitumbok nga gipalitan og shabu sa mga mamumuno.

Apan dihang ilaha na kining gigamit namatikdan sa mga suspek nga dili shabu ang ilang gisuyop sanglit parat kini nga daw asin ug aplod nga susama og tawas hinungdan nga ilang gikomprontase ang duha.

Diha-diha nagkainitay ang mga mamumuno ug ang biktima dihang gustong bawion sa mga suspek ang ilang kwarta kay sila nailad apan nagmagahi ang biktima hinungdan nga kalit nga mibunot og wala matinong kalibre sa armas ang suspek nga si Gerald dayong pusil   ni Acruz.

Si Acruz bisan samaran daling midagan palayo apan nahagba kini diha sa unahan samtang daling mikaratel og dagan ang mga suspek palayo sa dapit.

Ang mga silingan na sa biktima ug kabanay maoy midala kaniya sa Cebu City Medical Center apan gideklarar kining dead on arrival.

Dili palang dugay ang kapolisan mipahibalo nga duna nay mga sagol o ba kaha peke na karon ang mga gipamaligyang shabu gumikan kay menus na ang supply karon sa maong drogas apan daghan gihapon ang mamalit.

Base sa ulahing report nagkantidad karon og P300 ngadto sa P400 ang usa ka paketeng shabu nga kaniadto mapalit ra og P100. Nagsugod kanihit ang supply niini gumikan sa sunod-sunod ang operasyon sa kapolisan ug sa Philippine Drug Enforcement Agency.