Patay diha-diha ang usa ka 50-anyos nga amahan ug naangol ang anak niini sa dihang aksidenting nabuthan sa dinamita nga gidagkutan nga maoy ilang gigamit sa ilegal nga pagpanagat didto sa kadagatan sa barangay Agujo, lungsod sa Daanbantayan, Cebu niadtong Martes sa alas 4 sa hapon.
Ang biktima nga namatay gyud diha-diha giila sa kapolisan nga si Alberto Escuadra Capilitan, 50, molupyo sa nahisgutang lugar ug naangol usab ang anak niining kauban nga si Bertly John Conde Capilitan, 24, minyo ug nagpuyo ra usab sa maong lugar.
Matud ni PO3 Dennis Velez sa Daanbantayan Police Station sa dihang nahinabi sa Banat News subay sa inisyal nga imbestigasyon miggikan sa ilang pinuy-anan ang amahan ug anak ala una pasado sa hapon aron sa pagpanagat.
Apan sa dihang diha na sila sa dagat gidagkutan sa biktima ang usa sa tulo ka dinamita niining dala aron unta ilabay sa nagtapok nga isda sa dagat.
Apan wala pa gani niya mabuhi-i ang dinamita aksidente kining mibuto ug maayong pagkabungkag sa kamot niini ug pagkasamad sa lain-laing bahin sa lawas apil na ang naukab nga nawong niini nga naigo sa tipaka sa dinamita nga maoy hinungdan sa iyang hinanali nga kamatayon.
Samtang ang kauban niining anak nga si Bertly John nga diha sa tupad sa iyang amahan niadtong tungora nakaangkon usab og mga samad sa iyang lawas apil na sa walang bahin sa iyang nawong.
Ang mga miresponde nga tanod nga sila si Arnel Jehapon ug mga kaubanan mao nay mitabang ug mihatod sa mga biktima sa Daanbantayan District Hospital apan gideklarar nga dead on arrival (DOA) si Alberto samtang gi-refer sa Vicente Sotto Memorial Hospital dinhi sa dakbayan sa Sugbu ang anak nga si Bertly John tungod sa seryosong samad nga na-angkon niini.