P1 wala ikalipay sa Nadsu

Wala malipay ang Nagkahiusang Drayber sa Sugbu (NADSU) sa giaprobahan nga dugang P1 nga umento sa plitehan dinhi sa Central Visayas ilabi na sa Sugbu nga maghimo na unyang P7.50 ang bag-ong minimum nga plitehan sugod karong Biyernes.

Kini human gipadayag sa Provincial Coordinator sa NADSU, Rex Tedalgo dihang nahinabi sa  Banat News nga dili sulbad sa nasinati karong kalisod kanilang mga drayber nunot niining kanunay nga pagsaka sa presyo sa produktong petrolyo ang pagpatuman og umento sa pletehan.

“Mahog raman nga ang kita sa mga drayber gikaon ra sa pagsige og saka sa gasolina ug kun dunay pananglit take home nga 200 ang mga drayber kulang ra gihapon na tungod sa kamahal na sa bugas,” dugang asoy ni Tedalgo.

Matud ni Tedalgo nga giduso hinuon sa ilang grupo sa NADSU ang pagpatuman og rollback sa presyo sa produktong petrolyo tungod kay alang nila mao ra kini bugtong tubag sa kalisod nga nasinati nilang mga drayber pagkakaron.

Kini tungod kay matud niya maglisod usab ang mga sumasakay og magsige ug saka ang minimum nga pletehan ilabi na kadtong walay mga trabaho ug kadtong gagmay lang og suweldo.

Matud ni Tedalgo padayon gihapong gibarugan og giduso sa NADSU ang pagpatuman sa uniformity sa pletehan lukop nasud, pagbasura sa Oil deregulation Law ug labaw sa tanan gipanawagan nila ang pagpapas sa Expanded Value Added Tax (EVAT) nga maoy gihulagway nila nga nakapauyamot og samot sa nasud.