Unom ka tawo ang nabiktima sa tulis sulod sa ilang gisakyang jeep pasaheroan sa nagkalainlaing dapit ning dakbayan niadtong Lunes.
Unang midangop nga naminghoy ngadto sa Waterfront Police Station mao sila si Helen Ersando, hingkod, taga North Reclamation Area; Danilo Fernandez, 21, taga Consolacion,ug John Paul Bareng, 21. taga Guadalupe.
Ang tulo nakuhaan sa ilang mga cellphone nga mokantidad og P16,000, ug cash nga P650.
Ang mitulis kanila mao ang tulo ka tawong wala hiilhi nga gikasakay nila sa jeep.
Matud pa sa mga biktima nga samtang nagsubay ang ilang gisakyan sa David Gaisano St., sa barangay Tejero, usa sa mga tulisan milanit sa iyang .38 kalibre nga revolver ug gition kanila uban sa pagdeklarar nga tulis ug dayon gipanglangkat ang ilang mga butang.
Human sila himolbole sa ilang mga cellphone ug kuwarta, nanaog dayon sa PUJ ang tulo ug misakay sa laing PUJ paingon sa North Reclamation Area.
Samtang pagka-alas 7:00 sa gabii sa mao gihapong adlaw laing tulo na usab ka biktima sa susama gihapong tulis sa jeep pasaheroan sa may Jakosalem St., corner Legaspi.
Sila si Arlen Baya ,23, taga Salinas Drive, Lahug; Crystal Maluya, 25, taga Magallanes, ug Gizamie Ynot ,18, taga Camputhaw ning dakbayan maoy mga biktima.
Ang tulo nakuhaan gihapon sa ilang mga cell phone nga balor og P5,000,ug P2,500 cash sa nag-inusarang tulisan nga ilang gikasakay sulod gihapon sa jeep.
Ang kapolisan nga maoy gisumbongan sa maong mga hitabo nagpanlingo ug naglibog na usab unsaon sa pagsulbad niining mga kasoha.