Tungod sa panag-away kabahin sa problema sa pamilya natigbasan sa bana ang iyang asawa taliwala sa ilang panaglalis sa sitio San Miguel barangay Poblacion lungsod sa Asturias niadtong Domingo sa alas 7:05 sa gabii.
Ang biktima giila sa kapulisan nga si Liezel Bordaje Mahipos, 31, molupyo sa nahisgutang lugar samtang ang gitumbok nga suspek mao ra usab ang iyang bana nga si Jiovannie Mahipos, 30.
Matud ni Insp. Gerard Ace Pelare, hepe sa Asturias Police dihang nahinabi sa Banat News subay sa inisyal nilang imbestigasyon nakainom ang banang nauli sa balay ug nagkalalis sa iyang asawa.
“Domestic problem ra gud sa ilang pamilya daghan man ni sila og anak pito ka buok, niingon man ang bana nga ang hayhayan raman unta kuno ang iyang tuyo nga tigbason apan nilahos man sa agtang sa iyang asawa,” dugang asoy ni Pelare.
Dugang nahipos nga impormasyon sa kapulisan nga gisamukan ang suspek tungod sa pagsige og yawit sa asawa panahon nga siya makainom ug gituuhan naputong na kini maong naako niini og tigbas ang asawa sa agtang.
Ang biktima gidala sa Balamban District Hospital apan girekomendar sa mga doktor nga idiretso sa siyudad sa Sugbo tungod kay nagsigi og agas ang dugo sa samad sa agtang niini.
Ang bana nga suspek boluntaryo ra usab nga nitahan sa iyang kaugalingon sa kapulisan.