Mindanao group gi-monitor sa CCPO

Bisan pa man sa pagkasikop sa duha ka notadong tulisan nga miigo na dinhi sa dakbayan sa Sugbu ug pagkamatay sa usa nila ka kauban didto sa Pasay City niadtong Sabado, dili gihapon mokompiyansa ang Cebu City Police Office.

Kini maoy gibutyag ni Sr. Supt. Patrocinio Comendador ang director sa CCPO kagahapon tungod kay gawas sa grupo ni Roy Fernandez duna pay gitawag nga Mindanao Group nga diin giingong asa gikan sa Fernandez human mabungkag ang ilang orihinal nga grupong Kuratong Baleleng Gang.

Si Fernandez ug kaubanang sila si Pascual Mata ug George Avila nangadakpan sa Pasay City Police niadtong Sabado sa gabii diin napatay ang usa nila ka sakop nga si Albert Almedilla kinsa gikatahong nagplanong manulis og mga kliyente sa bangko dihang dapita.

Apan mitug-an ang kapolisan nga si Mata wala mogamit sa tinuod nga pangalan tungod kay ang tinuod nga pangalan niini mao si Danilo Flores kinsa maoy kauban sa grupo ni Casimero “Meloy” Garcia nga mitulis sa armored van sa Metrobank nga mikuha og kwarta diha sa La Nueva Supermart niadtong milabay’ng tuig.

Matud pang Comendador si Flores mao ang kanhi gwardiyang mao usab ang guide sa grupo dihang ilang gitulis ang maong supermart nga miresulta sa kamatayon sa usa ka gwardiya ug pagkaangol sa usa dihang ilang gitulis ang maong armored van.

Giangkon hinuon ni Comendador nga dako kini og epekto sa peace and order sa dakbayan kung ang tulis sa mga bangko ang hisgutan apan dili pa angayang mokumpiyansa tungod kay naa pa ang Mindanao Group.

Ang mitulis sa duha ka ahensya diha sa dalan Magallanes kapin usa ka bulan na ang nakalabay giingong mga sakop sa Mindanao group kansang mga miyembro ug lider nailhan na sa kapolisan.

“There would be an abatement of robberies involving this group but not totally like what happened in Oro Sugbu. Mindanao group is still capable and probably will strike here in the city or neighboring provinces,” asoy pang Comendador.

Sa pagkakaron duha ka kaso na ang gipasaka batok kang Fernandez kabahin sa pagtulis sa usa ka money changer diha sa Ayala Mall ug sa pagtulis sa bangko diha sa dakbayan sa Carcar apan wala pay migawas nga warrant of arrest.

Samtang si Flores duna nay warrant of arrest kabahin sa robbery with homicide sa nahitabo sa La Nueva.

 Nagpaabot pa ang CCPO sa resulta sa imbestigasyon sa grupo nga gihimo sa National Capital Region Police Office sanglit dunay posibilidad nga kini dad-on dinhi o ba kaha magpabilin didto depende sa kung asa kini mas dunay daghang kaso.

Gitumbok usab ang grupo nga posibleng may kalambigitan sa RCBC robbery with homicide.