Sakop sa Akrho gipatay sa Crips

Patay nang nadangat sa tambalanan ang usa ka sakop sa Alpha Kappa Rho (Akrho) human pusila sa sakop sa Crips gang kagahapon sa alas 12:30 sa kaadlawon diha sa  barangay Inayawan.

Ang namatay giila sa kapolisan nga si Viviano Villareal Jr. 25, waiter, nga taga dalan F. Jaca  samtang ang mipusil kaniya mao ang  duha ka sakop sa Crips gang nga sila si Jestone Tabura nga  silingan sa biktima ug laing kauban niini nga wa pa mailhi.

Sa imbestigasyon nila ni SPO1 Rogelio Nedamo  sa Homicide Section  ang igsuon sa biktima nga si Sharon Caballes  miingon nga ang iyang igsuon uban sa higala niini nga si Tacy Ocampo sa dihang kalit lang mibutho si Tabura nga nagmaneho sa motorsiklo Honda Bravo kolor blue (3890 GB) uban sa wala mailhing sakop sa Crips gang nga nag-angkas niini.

Matud pa nga nagpahinay sa pagpadagan si Tabura ug sa kalit lang ang angkas niini mipusil sa biktima makadaghang higayon hinungdan sa pagkaigo niini sa lawas.

Human sa pagpamusil  mipasirit sila sa pagpadagan sa motorsiklo paingon sa  dalan Tugas  sa nahisgutang barangay ug wala na maabti pa sa mga miresponding kapolisan.