Wa nay ulo, kamot ug tiil 'kit-an

Usa ka patay'ng lawas sa tawong wala nay ulo, mga kamot ug tiil gumikan sa kadugta na niini ang nakit-an nga midagsa sa lapyahan sa dagat  sa Lamanok island sakop sa isla sa Carnasa lungsod sa Daanbantayan niadtong Domingo sa udto.

Ang mga molupyo maoy nakakita sa maong patay'ng lawas tungod sa kabaho sa palibot sumala pang PO1 Henry Compuesto sa Daanbantayan Police dihang nahinabi sa Banat News.

Gihulagway nga ang patay'ng lawas nga nakit-an nalata na og maayo ug lisud na kaayong mailhan kun lalaki ba kini o babaye.

Kini human wala nay ulo ang maong patay'ng lawas ingon man wala na usab kiniy mga kamot ingon man duha ka mga tiil ug pulos lawas nalang ang nahabilin apan lata na usab kaayo ug  mialisbo na ang baho niini.

Ang kapitan sa barangay Carnasa nga si Jose Moreno mimandong ipalubong nalang kini niana dayong pagkahapon sa hilit nga lugar sa maong isla tungod peligro unya sa panglawas sa mga tawo.

Gidudahan sa kapulisan nga apil ang maong patay'ng lawas sa mga nalunod nga sakyanan sa dagat atol sa bagyong Frank nga diin ang M/V Princess of the Stars nalunod uban sa kapin 800 ka crew ug pasahero sa kadagatan sa Romblon.

Samtang usa ka wala mailhing tiguwang lalaki ang napalgang patay nga naglutaw sa kadagatan sa barangay Pasil ning dakbayan mga ala 1:00 sa hapon niadtong niaging adlaw.

Sa report sa Homicide Section sa Cebu City Police Office ang tiguwang nga lalaki gibana-banang nagpangidaron kinig 80 anyos nagsul-ob og itom nga purol, kasarangan ang panglawas, ug 5’1 ngadto sa 5’3 ang gitas-on.

Usa ka concerned citizen nga uban sa mga higala nga nangaligo’g dagat sa maong lugar maoy nakakita niini nga naglutaw na sa dagat ug gisuwayan og dala sa Cebu City Medical Center apan patay na kini