Jakosalem miangkon rerouting dili tukma

Wala sa tukma nga panahon ang pagpatuman sa Cebu City Traffic Operations and Management (Citom) sa rerouting sa pipila ka mga puj partikular na sa  04L nga rota.
Kini maoy giangkon ni Konsehal Sylvan   Jakosalem nga maoy chairman sa Committee on Transportation sa City Council ug sakop usab sa Citom board.
Ang Citom mipatuman og kausaban sa mga rota sa 13C ug 04L nga mga PUJ alang sa pagpaluag sa dagan sa trapiko sa pipila ka kadalanan sa dakbayan.
Apan kusganong misupak sa maong kausaban ang mga PUJ driver sa O4L nga rota, ug gani kini milusad og lihok-protesta atol sa pagsugod sa rerouting.
Kini tungod kay sa maong kausaban, ang mga PUJ nga gikan sa Lahug dili na makalahos ngadto sa SM ug kutob na lang sa Ayala.
Gitataw hinuon ni Jakosalem nga ang gipatuman nga rerouting sa Citom experimental lang ug posibleng duna pay mahimo unya nga kausaban.
Kini ilabi nga giingong dunay ubay-ubay nga nadawat nga reklamo ang Citom gikan mismo sa mga pasahero nga apektado sa gipatuman nga rerouting.
Nangreklamo ang mga pasahero tungod kay imbes usa lang sila ka sakay paingon sa SM, sila mapugos pagsakay og kaduha paingon sa ilang destinasyon.
Dinhi nakita ni  Jakosalem ang dili tukma nga pagpatuman sa rerouting tungod kay bag-o lang usab mi-umento ang minimum nga plitehan.

“I think the implementation of the rerouting is wrong-timing, anyway, experimental pa man na and we’ll discuss that on Wednesday during our Citom board meeting,” sumala sa konsehal.

Nasayran nga duna nay mga 04L driver nga wala mosunod sa gipatuman nga experimental rerouting ug padayong misubay sa ilang naandan nga rota.
 Miingon si Jakosalem nga ang nahisgutang mga drayber mahimong dakpon sa Citom personnel ug pamultahon sa ilang nahimo nga kalapasan.
Tambag sa konsehal ngadto sa maong mga drayber nga mosunod lang una sa rerouting samtang ila pang tukion karong Miyerkules ang maong hisgutanan.