Namukot nahog sa dam patay

Patay na nga napalgan sa mangayay og balas ang usa ka 78-anyos nga lalaki kinsa giingong nahulog sa dam ug nalumos samtang namukot kini kagahapon sa buntag sa barangay Jaclupan, dakbayan sa Talisay.

Ang biktima giila sa mga polis nga si Marcelo Basera, residente sa nahisgutang lugar ang daling gidala sa Talisay District Hospital apan wala na kini makaabot nga buhi sa nahisgutang tambalanan.

Si PO1 Jundave David ug PO2 Harrison Quiñanola sa homicide section sa Talisay City police station sa pakighinabi sa  Banat News  kagahapon sa buntag nagkanayon nga usa ka giilang “Cherry” nga mangayay og balas ang nakabangal kang Basera nga naglutaw na diha sa sapa sa nahisgutang barangay.

Si Cherry ang daling mitaho ngadto sa ilang kapitan nga si Joel Obiso ug ang nahisgutang kapitan ang mitaho ngadto sa kapolisan kabahin sa maong insidente.

Base sa imbestigasyon sa maong mga polis nga si Basera ang namukot diha sa ibabaw’ng bahin sa dam apan tungod sa kadangog naligas kini ug nahagbong ngadto sa ubos.

Si David mibana-bana nga sobra sa 20 ka tiil ang nahagbungan ni Basera ug posibleng ang ulo niini napantok tungod kay aduna sila’y nakitang samad hinungdan nga nalumos.