Action Center padayon

Magpabilin ang one-stop-shop action center diha sa Cebu City Sports Complex hangtud nga mahuman ang pagpahigayon sa dioxyribonucleic acid (DNA) test.

Kini maoy giklaro ni Cebu City Acting Mayor Michael Rama taliwa sa kalibog sa ubang kabanay sa mga biktima sa nalunod nga M/V Princess of the Stars nga sila papaulion na.

Ang DNA testing gikatakdang himuon sa sunod semana  kun mangabot na ang 3,000 ka mga DNA kits nga gikan sa Urupa.

Giklaro ni Rama nga ang ilang putlon sugod sa Lunes mao lang ang paghatag og pagkaon ngadto sa kabanay sa mga biktima nga anaa diha sa sports complex.

Apan makapadayon ang mga kabanay sa mga biktima sa nalunod nga barko pag-process sa mga dokumento alang sa death claims nga gitanyag sa Sulpicio management.

Midugang si Rama nga dili na usab nila tugutan ang mga kabanay nga anha mangatulog sa sports complex sugod sa sunod semana.

Walay gitanyag nga lugar ang kagamhanan sa dakbayan alang niadtong mga pamilya nga padayong maghikay sa ilang mga papeles.

Partikular na niini kadtong mga kabanay nga gikan pa sa kasikbit nga mga probinsya ilabi na niadtong gikan sa Mindanao.

Nagtoo hinoon ang chairman sa Cebu City Disaster Coordinating Council, Gerardo Carillo nga pangitaan og solusyon sa nasudnong kagamhanan ang maong problema.

Miingon si Carillo nga gitakdang mopatawag og tigom si Presidential Assistant for the Visayas, Felix Guanzon, alang sa maong katuyuan.

Gipahunong na sa National Bureau of Investigation (NBI) ang public viewing sa mga patay’ng lawas kay giingong anaa na sa “advanced stage of decomposition” ug lisod nang ilhon ang mga patay.