Pipila sa kabanay na-blangko

Gumikan sa problema, kawalay kasigurohang makita pa pag-usab ang ilang mga kabanay pipila na sa mga kabanay’ng nagbalik-balik diha sa action center sa Cebu City Sports Center ang gikakitaan na og senyales nga susama na og nalisuan sa pangisip ug ang uban maglisod og katulog.

Matud pang Grace Yana, social welfare 4  sa Department of Social Welfare and Development-7 sa Banat News dunay tulo ka mga kabanay na kansang mga mahal sa kinabuhi ang gikunsiderar na nilang “high risk” ang sitwasyon sa pangisip.

Kini gumikan sa ilang gipakitang mga lihok sama sa pagyawyaw nga nag-inusara, blangko ang huna-huna ug motan-aw sa layo.

Kining tulo (mga pangalan ug pangalan sa ilang na-missing nga kabanay gipugngan) gikatahong dili na matabang sa ordinaryong counseling tungod kay blangko na ang huna-huna.

Hinuon gikatahong wala pa mopakita ang tulo og senyales nga manakit na sa uban apan ila na kining gikunsulta ngadto sa Department of Health aron maatiman.

Ang kadaghanan hinuon sa mga kabanay sa mga pasahero ug crews sa nalunod nga MV Princess of the Stars nakasugakod pa sa ilang kaguol ug makapagawas pa sa ilang gibati sa mga counselors sa DSWD.

Duna say mga kabanay nga gumikan sa sitwasyon karon duna na kanila’y mosinghag sa mga social welfare officers, magpakita og senyales nga sila nasuko ug uban pa nga sumala pang Yana natural lang nga bation sa tawong naa sa ingon niining sitwasyon.

Dugang pa niini panahon sa kagabhion pipila sa mga kabanay’ng diha na magtulugan sa action centers ang magpunay og limbag ug dili mapuyo sa gihigdaan tungod kay di makatulog.

Matud pang Yana ang mga trahedyang susama niini nga nakaingon sa pagkawala sa mga minahal sa kinabuhi niining mga kabanay maoy nakaingon sa ilang kahimtang karon.

“Mas sakit man gud nang mahuwat ka pa kanus-a moabot ug kung duna pa bay paabuton. Motulo gyud ang imong luha kinahanglang naa gyud sila’y maestoryahan, ang amo is just to listen,” asoy pang Yana.

“Ang ilang gipakitang thoughts, feelings, reactions are normal during this abnormal situation,” dugang pa niini.

Ang DSWD mibutang na og tulo ka shifts nga 25 ka social officers matag adlaw aron matabangan ang mga kabanay, sila usab maoy nahimong tulay sa mga kabanay ngadto sa mga local government units diin magpuyo ang na-missing nga pasahero.

Dunay mga insidenteng ang social welfare mahutdan na og pailob sa mga kabanay maong mananghid nalang sila nga  mopahulay una ug dili magpabutang sa frontline, ning paagiha dili masamok ang operasyon.

Ang DSWD mipagawas na og pundong P900 aron idugang sa pundong gipagawas sa dakbayan sa Sugbu aron ipakaon sa mga kabanay ug uban pang expenses.

Samtang kagahapon, 160 na ka kabanay sa mga patay ug missing nga pasahero ang nahatagan og tag P10,000 nga gikan ni Presidente Gloria Arroyo.