Ang kagamhanan sa dakbayan sa Lapulapu mibutang og help desk diha sa Action Center sa Abellana Sports Complex sugod kagahapong adlawa alang sa mga kabanay sa nabiktima sa nalunod nga MV Princess of the Stars nga taga Lapulapu aron matabangan nga mahuman ang tanang dokumento aron makakuha sa ilang claims.
Si Mark Bao, social worker sa DSWD sa Lapulapu City mitug-an sa Banat News duna silay rice probation nga tag tulo ka kilong bugas ang gipanghatag sa kabanay sa kada usa ka biktima.
“Pananglitan sa usa ka pamilya tulo ang nakalas, balig siyam ka kilong bugas humay ang madawat sa tagtungod,” sumala pa ni Bao.
Miingon si Bao dunay 40 ka mga pasahero gikan sa ilang dakbayan lakip sa crew ang naa sa maong barko, duha lang ang survivors niini nga sila si Phil Gelig, crew, nga taga barangay Agus Gamay, Oliver Amorin, pasahero nga taga Olango Island.
Samtang usa ang kompirmadong namatay mao si Felipe Omandac Jr. taga barangay Looc sa maong siyudad ug 37 niini ang pabiling na-missing hangtud karon.
Matud ni Bao ang kagamhanan sa Lapulapu mihatag og P5,000 isip financial assistance sa kada pamilya sa minatay ug laing P10,000 sa na-missing o ba kaha nailhan na nga patay.
Midugang siya mahimo gihapon ang mga kabanay nga adto sa ilang buhatan sa DSWD Lapulapu mohatag sa ilang dokumento tungod kay sugod karung adlaw’ng Lunes ang taga probinsya ug Metro Cebu dili na paanhaon sa Action Center sa Abellana Sports Complex.