Opisyal sa LTFRB-Manila makigtagbo sa drayber/operator
Ang mga drayber ug operator sa Sugbo gitakdang makigtagbo kang Executive Director Emmanuel Mahipos sa Land Transportation Franchising and Regulatory Board (LTFRB) Central office nga moanhi sa Sugbo karong Sabado.
Kini ang nasayran sa Banat News gikan sa chairman sa Cebu Integrated Transport Service Cooperative (CITRASCO) Clifford Niñal kinsa nagkanayon nga adto sila magtagbo sa Casino Español kauban ni LTFRB 7 Regional Director Romulo Bernardes.
Usa sa ilang tukion mao ang planong pagtakli nila sa paggamit sa Liquified Petroleum Gas (LPG) sa ilang mga sakyanan.
Si Niñal miingon nga sayron usab nila kun pautangon ba sila sa gobyerno og kuwarta kun usbon nila ang desinyo sa ilang sakyanan ngadto sa paggamit og LPG.
Naglakip sa mga drayber ug operator nga motambong sa maong panagtagbo mao ang nagkalainlaing kahugpongan ug kooperatiba sa mga operator ug driver sa PUJ , bus, taxi ug uban pa.
Susihon usab sa mga drayber ang giduso nilang petisyon nga P250 nga minimum nga plitehan ngadto sa ulohang buhatan sa LTFRB kun unsa nay kahimtang niini.
- Latest
- Trending
