Padayon pang nanghipos og mga ebidensiya ang Land Franchising and Regulatory Board (LTFRB-7) batok sa mga operator ug drayber nga misalmot sa gilusad nga transport strike sa Nagkahiusang Drayber sa Sugbu (NADSU) niadtong Lunes nga gibana banang nakaparalisar sa 80 porsiyento sa transportasiyon sa dakbayan sa Sugbu og Metro Cebu.
Gibutyag ni LTFRB-7 director Romulo Bernardes dihang nahinabi sa Banat News iya nang napahibalo ang ilang buhatan kabahin sa lakang nga ilang himuon nga pag-imbestigar niadtong mga operator ug drayber sa PUJ nga misalmot sa maong welga.
Gitug-an ni Bernardes nga pagkakaron anaa pa sila sa punto nga pagtino sa mga rota nga paralisado sa gilusad nga welga ug aron pag-ila sa mga operator sa PUJ nga nagbiyahean ning maong mga lugar aron masumonan ang mga operator ug drayber alang sa pormal nga imbistigasyon.
Giklaro sa direktor nga posibleng ipa-revoke nila ang mga prangkisa sa mga PUJ unit nga mapamatud-an sa imbestigasiyon nga misalmot sa welga sa higayon nga ma-establisar nila ang ‘abandonment’.
Gipasabot sa direktor nga apil sa kasabutan ug obligasyon sa mga operator dihang gi-aprobahan ang paghatag nila og prangkisa mao ang pagserbisyo sa publiko ug dili ang paghatag og kahasol niini sama sa pagsalmot sa mga welga nga himuon.
Nasayran nga daghan ang mga pasahero ang natanggong ilabi na sa Mandaue-Jones nga rota sa dihang gilusad ang welga niadtong Lunes tungod kay syento porsiyento man sa mga rota sa Mandaue, Lapulapu, Consolacion, Lilo-an ug siyudad sa Danao ang paralisado.
Wala pa kini labot sa ubang mga rota dinhi sa dakbayan sama sa Pardo, Inayawan, Labangon, Talamban, Guadalupe, Banawa nga minus usab ang mga mibiyahe nga PUJ atol sa maong welga.