Usa ka batang babaye nga bag-ohay pang gihimugso nakuykoyan nga gilubong sa tugkaran sa Toledo Power Plant sa Poblacion dakbayan sa Toledo niadtong Lunes sa ala una sa hapon.
Ang maong patay’ng lawas giputos og plastik ug gisekrito unta og lubong sulod sa compound sa maong planta.
Gibutyag ni PO1 Celso Maquidato sa Toledo City Police Station sa dihang nahinabi sa Banat News subay sa blotter niini nga base sa inisyal nga imbistigasyon gikan sa usa ka Cristina Antopina, 58, balo ug molupyo sa maong lugar gitug-an niini nga nanganak ang iyang anak babaye nga si Maribel, 39, niadtong Hunyo 28, sa may alas 4 sa kaadlawon.
Gitug-an niini sa gihimong pagsukit-sukit sa kapolisan nga tungod kay wala silay kuwarta diha lang kini sa ilang balay niya gipaanak nga bisan midwife walay nag-asikaso.
Nasayran nga human sa pagpanganak niini, namatay usab ang bata ug diha lang kini gilubong sa maong lugar nga giputos og plastik.
Samtang ang inahan nga si Maribel namatay usab kini sa komplikasyon sa pagka alas 7:30 niadtong Lunes sa gabii.
Dugang nahipos nga kasayuran sa kapolisan gikan sa ginikanan nga niadtong Hunyo 1, una nang gi-diagnose ang biktima og hypertension sa pagpa-check up niini ug duna pay laing gipamati sa pagsabak niini apan wala gyud kini magpatambal sa doktor tungod kay walay kwarta nga ikapalit sa mga resitang tambal.
Ang municipal health office sa Toledo mitambag sa tagtungod nga dunganon na lang paglubong sa sementeryo ang inahan ug ang namatay niining anak.