Upat ang namatay ug laing pito ang naangol human malubong ang upat ka balay sa nahitabong landslide didto sa Sitio Escaltam,Poblacion lungsod sa Samboan, Cebu alas 9:30 sa milabay’ng gabii.
Ang mga namatay giila sa kapolisan nga sila si Florenz Galla, 30, minyo, Nathaniel Cañete, 4, Erol Cañete, 2 ug ang kapin sa tuig pa lang nga si Edwin Galla nga anak ni Florenz.
Samtang ang mga naangol giila nga sila si Edwin Galla Sr., bana ni Florenz, mga anak nga sila si Rowella Galla, 4, Ritchell Galla, 3, Judith Galla, 27, George Caballero, 52, Richard Caballero, 14 ug Raymond Caballero, 13.
Matud ni SPO1 Dominador Ferolino, imbestigador sa Samboan Police Station sa dihang nahinabi sa Banat News nga alas 9 pasado sa gabii nadawat nila ang report sa nahitabong landslide.
Tungod kini sa pagkahunlak sa riprap daplin sa national road nga miresulta sa pagdahili ug pagkahugno sa yuta nga mitabon sa upat ka mga panimalay nga nahimutang sa ubos nga bahin.
Matud ni Ferolino tungod kini sa pagsige og uwan- uwan gikan pa sa sayong gabii hangtod na sa pagka kaadlawon. Gani nabasa sila sa uwan samtang nagpahigayon og rescue operation sa mga biktima.
Alas 8 na kagahapon sa buntag nakit-an ang patay’ng lawas sa kapin sa tuig nga bata nga si Edwin Galla nga natabunan sa yuta nga mitapon sa ilang panimalay.
Nunot niini, si Samboan Mayor Raymund Joseph Calderon mibutyag sa dihang nahinabi sa Banat News sugod kagahapon gipabakwit dayon nila ang nahabiling nga 14 ka mga pamilya sa maong lugar ug temporaryong gipahiluna sa Central School sa barangay Poblacion.
Gipasabot sa mayor nga peligro kaayo ang maong lugar sa subling landslide ilabi na kun masinati ang pag-ulan-ulan tungod sa pagkaguba sa riprap.
Matud sa mayor ilang pangitaan og relocation site ang maong mga pamilya samtang gipasalig usab niya nga mohatag og burial assistance sa mga namatay nga biktima.
Gipahibalo usab sa mayor nga mipadala dayon og relief goods sa mga biktima ang Kapitolyo kagahapon human niya gipahibalo sa maong panghitabo.