Babaye ‘nangilad’ napriso

Nagtingkagol na sa karsel sa Carbon Police Station ang 40 anyos nga babaye human masikop nga nangilad sulod sa ATM booth sa usa ka tigulang nga lalaki mga alas 10:45 sa buntag diha sa gawas nga bahin sa usa ka mall sa Natalio Bacalso Ave.

Ang nadakpan ug gipasakaan na og kasong theft kagahapon mao si Edilisa Bayking, 40, taga Cansojong, dakbayan sa Talisay, kinsa nagdalag daghang alias nga si “Beca Abajo” ug “Marites Layasa”.

Samtang ang  biktima mao si Melanio Saldua, 76, taga Poblacion, lungsud sa Badian kinsa wala pa makatino sa kantidad nga nakuha sa iyang ATM.

Si PO3 Rogelio Caballes sa Carbon Police Station nga gikahinabi sa Banat News nagkanayon nga modus na ni Bayking nga magsuroy-suroy sa mga ATM booth dinhi sa dakbayan ug moabag niadtong maglisod sa pag-withdraw sa ilang mga pundo sa ATM.

Ang biktima makaduha na makapangayo’g panabang sa suspetsado pag-withdraw sa ATM ug kun mahatag na ang PIN number tuyoon niini sa pagpindot nga sayop.

Kun mouli ang biktima sundon niini pinaagi sa pag- swipe sa gidala niini nga ATM ug maoy mokobra sa kuwarta apan gidemalas ang suspetsado dihang mi-report ang 76 anyos sa kapolisan.