Gasolinahan gitulis sa 3

Gitulis sa tulo ka armadong tawo nga nagsakay og motorsiklo ang usa ka gasolinahan kagahapon sa udto sa barangay Magay sa lungsod sa Compostela.

Ang gitulis mao ang Flying V gasoline station nga gipanag-iya ni Francisco Abera, hingkod ang pangidaron ug nagpuyo ra sa nahisgutang lugar dili halayo sa maong gasolinahan.

Matud pang PO1 Fedelito Jopia sa Compostela Police ang tulo ka mga tulisan sakay sa kolor itom nga XRM motorsiklo ug nagpakaaron ingnon nga magpatubil.

Ang pump boy nga sila si Roel Pareja,  22, Aquilino Rabor, 26, taga barangay Bulwang, Compostela ug Merrel Castro nagkanayon nagtuo silang kustomer ang tulo apan nakugang nalang sila dihang kalit silang mideklarar og tulis.

Usa sa mga tulisan miduol kang Pareja dayong tion sa pistola ug gibira ang beltbag sa hawak ni Pareja nga dunay sulod nga P12,000. Samtang ang lain tulisan miduol usab kang Rabor ug gikuha usab ang bag nga gitangkil sa hawak niini nga dunay sulod nga P23,000.

Matud ni PO1 Jopia nga naandan na unta sa mga pumpboy nga matag 2 mil ngadto sa 3 mil nilang halin ilang i-remit ngadto sa tag-iya sa Flying V apan niadtong higayona wala kini mahatod sa tag-iya. Dugang pa ni PO1 Jopia ang ikatulong pumpboy nga si Castro misakay sa motorsiklo sa iyang kaila nga nagpatubil human sila gitulis ug gigukod ang mga tulisan nga paingon sa dakbayan sa Sugbu.

Apan naabot nalang sila sa lungsod sa Liloan apan wala na nila kini igkita.