BFAD gibasol pagdaghan sa mga “food supplements”

Gibasol ni Cebu City Councilor Christopher Alix ang Bureau of Food and Drugs (BFAD) sa giingong pagpanglingla sa mga nagbaligya og mga food supplement.

Ang konsehal nga maoy chairman sa Committee on Health sa City Council miingon nga gipasagdan lang sa BFAD ang gibuhat sa mga distributor niini.

Partikular na sa ilang mga radio ug TV advertisement nga nangombinsir sa mga naminaw ug nagtan-aw nga kini makaayo sa nagkadaiyang matang sa sakit.

Ang maong reaksyon giluwatan sa konsehal human usab masayod sa gihimo karong pasidaan sa BFAD ngadto sa mga konsumidor nga ang maong mga produkto walay “therapeutic effect” o dili makaayo og sakit.

Kini tungod sa nagpadayong pagdagsang niini sa nagkadaiyang tindahan ug sa nagkadaghang namalit niini nga mga konsumidor.

Gitataw sa maong ahensya nga ang mga food supplement dili makaayo og mga sakit ug kini giingong delikado nga makamugna na hinoon og komplikasyon.

Midugang ang BFAD nga ang food supplement makahatag lang og dugang nutrients apan walay medical benefits ngadto sa motumar niini.

Matud ni Alix nga angayang putlon na sa BFAD ang mga binuang nga gihimo sa mga distributor og mga food supplement samtang dili pa awahi ang tanan.

Kini pinaagi usab sa regular nga pagmonitor gawas sa estriktong pagpatuman sa gikinahanglang mga rekisitos.

Nasayran nga dunay mga food supplement nga giangkat pa gikan sa ubang kanasuran ug dunay hinimo lang usab dinhi sa nasod.

Apan ang trade liberalization policy nga gisagop sa gobiyerno maoy giingong miabli sa pultahan alang sa mga imported products nga gikahadlukang mga substandard.