SAR operation gihunong sa PCG

Gipahunong ang rescue and retrieval operation sa kagamhanan human madiskubreheng may kargang insecticides ang nalunod nga barkong MV Princess of the Star sa Sulpicio Lines.

Ang maong mga pestesidyo gikahadlukang makadaut sa kadagatan ug labaw na sa mga divers sa Philippine Coast Guard ug militar nga mipahigayon og search and rescue and retrieval operation sa maong barko.

Si Bise Presidente Noli de Castro mimando atol sa briefing sa National Disaster and Coordinating Council (NDCC) kagahapon nga ipahunong una ang operasyon.

Nasuta nga ang maong mga pestisidyo gikatahong may gibug-atong 10 metriko toneladas ug igpapadalahay ngadto sa Del Monte Philippines alang sa ilang pananom nga pinya.

“We shorted the retrieval operations because of the pesticide inside the ship,” nagkanayon si De Castro.

Dugang pa niya nga sa kasamtangan walay mga timailhan nga ang 40 footer container van nga maoy gisudlan sa maong kemikal naabli.

Si De Castro miingon nga nag-umol na karon sa kagamhanan ang paghimog lakang batok sa Sulpicio Lines sa ilang pagtago sa kasayuran labot sa ilang kargang kemikal ug ang maong kasayuran ilang nakuha gikan sa Department of Transportation and Communication.

“Ang malinaw dito since day one hindi agad sinabi na may pesticide sa loob ng barko,” nagkanayon si De Castro.  “Of course we are preparing whatever action to be taken against Sulpicio Lines,” dugang pa niini.

 Sa iyang bahin ni Transportation Undersecretary Elena Bautista nga maoy nangulo sa task force maoy iyang gipadayag nga gipaabot lamang sa mga divers ang luwatan nga kamandoan sa labaw nilang buhatan alang sa pagpadayon sa ilang operasyon.

Matud pa niya nga ang ilang gikabalak-an karon mao ang panglawas sa ilang mga divers nga molungtad pa og pipila ka mga adlaw ang ilang search and retrieval operation nga pagahimoon.

“Pinatigil namin ang pagpapasisid sa divers, antayin na lang natin ang abeso sa Manila kung ano ang susunod na kailangang gawin,” ni Bautista pa.