Ulo ug lawas nagbuwag gilabay sa sapa

Naukayan sa mga mananagat nga namasol sa sapa sa sitio Tangub, barangay Lagtang, Talisay City kagahapon sa udto ang usa ka tawong patay nga baho na kaayo nga gituohang gilabay sa maong lugar.

Si Konsehal Ronnie Cabuenas sa Lagtang mitug-an sa  Banat News  nga nagbuwag na ang lawas ug ulo sa maong tawo ug dili na kini mailhan kay nadugta na.

Matud ni Cabuenas nga posibleng gilabay lang sa mga tawong wala hiilhi diha sa bung-aw nga may kawayanan sa Tangub ang maong patay'ng lawas.

Si Kapitan Celiapo Cabuenas  mitawag dayon sa kapolisan sa Talisay   nga girespondihan usab nila ni PO2 Lino Diez ug PO1 Erwin Carbonquillo sa homicide section sa Talisay Police Station.

Matud pa ni Carbonquillo nga nakalabera na ang maong tawo kay  gikitkit  ang mga unod niini sa mga mananap.

Apan wala pa madugta ang  T-shirt nga orange nga dunay markang ‘diesel” ug  maong nga short pants nga adunay pitaka nga maoy gisul-ob sa biktima.

Apan tungod kay way ID ang iyang pitaka, wa gyuy nakaila niini hangtod sa pag-ugkat ning maong biktima.

Ang maong patay'ng lawas nga gituohan sa kapolisan  nga may tulo na ka semanang gilabay didto sa lugar diin kini hikit-i, gidala  ngadto sa ilang buhatan kay wala nay punerarya nga mihakot niini.

Si Carbonquillo miingon  nga pag-ubog nila sa sapa hapit sila maanod tungod sa kakusog sa sulog niini samtang gipas-an nila ang karton nga maoy gisudlan sa  lawas sa biktima nga nagduga pa.

Sa pagkakaron ang kapolisan sa Talisay padayon pa sa pag-awhag sa mga pamilya nga nawad-an og sakop nga mosil-ing didto sa ilang buhatan aron masuta kun ila ba kining  kaila o  minahal sa kinabuhi.