Namiyesta giunay og patay sa ig-agaw

Usa ka tawo nga nahubog ug  nanumbag sa operator sa sound system atol sa piyesta sa barangay Inayagan, Naga niadtong Miyerkules sa kaadlawon gidunggab ug gipatay pag-unay sa iyang ig-agaw.

Ang biktima nga nakaangkon og samad sa  tiyan giila nga si Joel Engbino, 36 anyos, minyo ug molupyo sa barangay Tunghaan , Minglanilla samtang ang mibuno kaniya mao si Harold Navales,  20, ulitawo nga iya ra usab nga ig-agaw nga taga Inayagan, Naga.

Gibutyag ni SPO1 Randolf Rivera sa Naga City Police Station dihang nahinabi sa Banat News  nga ang biktima gidapit sa  suspetsado nga mamiyesta sa ilang lugar.

Apan samtang nanayaw sila sa diskohan, ang biktima nga nahubog na nanukmag   sa operator sa  sound system nga maoy hinungdan sa panaglalis sa duha hangtod nga nagkasinumbagay.

Apan wala makuntento ang suspetsado sa kumo, gilanit niini ang iyang ice pick ug gidunggab ang biktima hinungdan sa kamatayon niini.