Balay sa mga tigulang gisunog

Usa ka tigulang lalaki naangol human gituyo og sunog sa silingang amahan ug anak ang pinuy-anan niini sa Sitio Sangkugi barangay Banban, siyudad sa Bogo niadtong Martes sa alas 6 sa gabii.

Si Paulo Camay Balbero, 65, nalandig sa Verallo District Hospital human makaangkon og paso sa lawas sa dihang natagakan og nagkalayo nga kahoy.

Hingpit nga naabo ang balay ni Balbero ug deriyot kini matanggong kauban ang iyang asawa nga si Lauriana, 64, samtang naningkamot silang makagawas sa nagdilaab nilang panimalay.

Si SPO4 Emanuel Masong sa Bogo City Police Station mitumbok ni Samuel Noynoy Sumanting, 47, ug anak niining si Junjun, 18, nga maoy misunog sa balay sa silingan nilang mga Balbero pinaagi sa paglabay og mga kinusikusi nga panapton nga gibasa og gas dayong gidagkutan.

Ang kabomberohan sa siyudad sa Bogo mibanabana nga P654 mil ang danyos sa balay ug kagamitan nga naugdaw, apil na ang motorsiklo ug mga sinakong bugas mais ingon man kuwarta nga halin sa gibaligyang baka.

Matud ni SPO4 Masong nga si Samuel nga ilang nadakpan miasoy kanila nga naglagot sila sa mga biktima ug mao kini ilang gipasanginlan nga mipabarang sa namatay nilang amahan         pipila ka mga bulan na ang nakalabay.

Giandam na sa kapolisan ang kasong arson batok sa mag-amahan nga Sumanting.