Mga kabanay sa ‘Star’ victims mangiha?

Duna nay mga kabanay sa mga pasahero sa nalunod nga MV Princess of the Stars ang naghuna-hunang modangop og abogado aron masigurong mahatag kanila ang kung unsay nalatid sa ilang mga katungod isip kabanay sa mga pasahero ug tripulanteng nangamatay ug na-missing.

Kini gumikan sa ilang pasangil nga wala gihapoy alibyo sa operasyon tungod kay hangtud kagahapong adlawa wala pa gihapoy nangabot nga mga patay'ng lawas sa mga biktima ug ingon man ang paglaom nga dunay senyales nga duna pay buhi sa mga pasahero.

Si Ines Pepito, 52, nga taga barangay Carreta sa dakbayan sa Sugbu kansang igsuon ug duha ka pag-umangkong lalaki sakay sa maong barko nagkanayon nga desidido moapil kung magkahiusa ang ubang mga kabanay sa mga pasahero nga mopasaka og kaso batok sa Sulpicio Lines.

Ang igsuon ni Pepito nga si Rosalia Gipgano,48, ug anak sa naulahi nga si Richard Gipgano,31, miadto sa Manila pagsugat sa manghod ni Richard nga si Joselito, 25, nga usa ka seaman nga nagtrabaho sa usa ka cruise liner sa gawas sa nasud.

“Nagplano mi nga mokuha og abogado kay mura’g gipasa-pasa ra mi diri, kanang mga lamesa-lamesa nga assistance desk walay natubag kay pulos ra pangutana,” asoy pang Pepito.

Nabalaka pag-ayo ang mga kabanay nga tanto unyang kalisod nga mailhan ang mga patay'ng lawas madeklarar nalang gyud unyang ‘missing’ ang ilang mga mahal sa kinabuhi ug wala na hinuon sila’y makuha sa ilang mga claims.

Kagahapon ang Public Attorney’s Office-7 mibutang na usab og ilang kaugalingong “help desk” diha sa action center sa Cebu City Sports Complex gymnasium aron makatubag ug makahatag og legal advice sa mga paryente ilabi na kabahin sa ilang mga claims.

Si PAO-7 regional director Atty. Maria G-Reel Calinawan sa pakighinabi sa Banat News mitug-an nga sa pagkakaron wala pay kabanay'ng miduol kanila aron mopasaka og kaso batok sa Sulpicio Lines hinuon andam ang ilang buhatan sa pagtabang kanila kung gikinahanglan.

“Kung asa pwede kutob ang atong mahatag nga tabang, bisan kung gikinahanglang moabot sa point nga mokiha,” asoy pang Calinawan, apan sa pagkakaron sagad sa mga pangutana may labot sa typographical errors sa ilang mga birth certificates, Id's ug uban pang dokumentong gamiton sa pag-claim unya sa mga patay'ng lawas ug sa madawat nga burial ug insurances.

Usa ka Nilo Quirante nga taga Negros Oriental ang miduol kagahapon kang Calinawan ug nagpangutana kabahin sa giingong wala paghatag og bili sa Sulpicio Lines sa iyang gamay'ng hangyo nga ipa-double check og tan-aw ang mga patay'ng lawas nga gikarga sa MV Cebu Princess nga gikatakdang moabot karong buntag dinhi kung naapil ba ang iyang igsuong babaye.

Matud pang Quirante gikatahong gitubag ra siya sa taga Sulpicio Lines nga iyang giduol diha sa help desk nga “posible” nga naapil na og karga ang iyang igsuong si Julie Mendoza, nga usa ka parlor employee sa maong barko.

Apan gumikan sa kawalay kasiguruhan sa tanang impormasyong nasinati sukad pa niadtong Domingo naniguro gyud si Quirante nga naapil og karga ang iyang igsuon. Si Mendoza apil sa labing unang upat ka patay'ng lawas nga narekober sa lungsod sa San Fernando, Sibuyan Island.

Sa text message nga gipadala sa Sulpicio Lines dinhi sa Banat News kini mibutyag nga ilang gihimo ang tanan aron mapadali ang solusyon sa problema ug karong adlawa mangabot ang labing unang batch sa mga patay'ng lawas nga gikan sa Romblon.

Ang MV Cebu Princess may dalang 47 ka patay'ng lawas mibiya kagabii gikan sa Cresta de Gallo Island. Samtang ang upat ka mga survivors Jonathan Pendon, Exuterio Pendon ug Danilo Templeza nangabot sa Mactan Cebu International Airport samtang si Rupert Tan nakauli na usab sa Cagayan de Oro City luwan sa abyon kagabii.