Positibong giila sa uyuan ang napalgang patay sa Isla sa Hintotolo lalawigan sa Masbate nga nabangalan ug gidala sa M/V Don Alfredo Sr. dinhi sa Sugbu.
Ang patay'ng nailhan nga si Jesphino Las Piñas Sinugbuhan, 40, lumad sa barangay Bata, Bacolod City usa ka Sonar Operator sa usa ka fishing boat.
Gumikan sa iyang mga patik sa lawas ug patik sa Guardians ug ang anga niini nga “Pinoy” nga gikulit sa abaga positibo siyang nailhan sa iyang uyuan nga si Jovelito Las Piñas nga lumad usab sa Bacolod City.
Si Sinugbuhan nga maoy usa sa 31 ka mga tripulante sa F/B Jamboree nga gipanag-iya sa usa ka naila lang sa ngalang Chua taga Bacolod City.
Petsa 18 ning bulana mipalawod ang F/B Jamboree aron managat apan napagngan kini sa makina diha sa Lutaya Island sa Roxas City ug human maayo mipadayon unta sa ilang paglawig apan nasugatan ang bagyong “Frank.”
Gikatahong nakapadala pa og text si Sinugbuhan sa asawa nga si Bernadette nga nagkanayon “Ma, pray for us, kay mitakilid na ang barko,” sukad niadto wala na makontak ang biktima.
Matud pa ni Las Piñas nga lima sa mga kauban ni Sinugbuhan ang naluwas samtang pito ang patay nga pulos napadpad sa Burias Island sa Masbate ug ang 19 ka mga kauban niini missing pa hangtod ning pagsuwat sa balita.