City admin, ABC mi-ombudsman ni Pelaez

Pormal nga gihangyo kagahapon sa city administrator sa dakbayan sa Lapulapu ang Office of the Ombudsman-Visayas sa pag-imbestigar sa negosyanteng si Efrain Pelaez, samtang sa miaging adlaw ang Association of Barangay Council mismo ang misang-at og kaso batok sa maong negosyante.

Si city administrator Teodulo Ybañez nagkanayon sa iyang sulat ngadto ni Deputy Ombudsman for Visayas Pelagio Apostol nga angayang imbestigahon si Pelaez tungod sa kalabutan niini sa kasong korupsiyon ni kanhi Mayor Ernest Luke Weigel.

Ang asawa ug anak sa kanhi mayor nga sila si Paz ug Mark Steven Weigel miluwat og affidavit nga naglambigit sa negosyante ngadto sa panuborno.

Sumala pa ni Ybañez nga ang maong isyu namantala na sa mga pamantalaan ug mahimo nang kabasehan sa Ombudsman pagsusi niini.

“Mr. Efrain Pelaez Jr. is the president of MICCI, an accredited graft watch unit of the Ombudsman. If the allegations be proven true, it would be ironic that the one heading an accredited graft watch unit is himself, corrupt, then it would be a big blow and only tends to tarnish the image of the Ombudsman,” si Ybañez nagkanayon sa iyang sulat ngadto kang Apostol.

Buot ni Ybañez nga tun-an ang affidavit sa mga Weigel aron himuon kining basehan sa kaso batok ni Pelaez.

Nagtuo si Ybañez nga igo na ang affidavit sa mga Weigel nga himuong basehan aron mapasakaan og kaso si Pelaez.

Niadtong Martes, ang ABC sa Lapulapu nga gipangulohan sa presidente niini nga si Leo Mercado misang-at sa ilang resolusyon ngadto kang Apostol aron awhagon kini sa pagsusi sa binuhatan ni Pelaez.

Gihulagway sa ABC ang buhat ni Pelaez nga pagpang-harass sa mga opisyal sa dakbayan sa Lapulapu ginamit ang Ombudsman.

Sumala pa sa sulat ni Mercado ngadto kang Apostol nga hapit na mo-usa ka tuig nga nagsige og panaot ang negosyante sa kagamhanan sa dakbayan sa Lapulapu, bisan aduna kini kalambigitan sa isyu sa korupsiyon sa kanhi administrasyon.

Gihangyo usab ni Mercado ang Ombudsman sa pagsusi sa kasabutan niini aron tan-awon ang paggamit ni Pelaez sa Ombudsman alang sa kaugalingon niyang interes.

“Whereas, in order for the Ombudsman to retain its independence and integrity, there is an imperative necessity to investigate and assess the activities and abuses of Mr. Pelaez and his organization for it to continue as an anti-graft watch unit, and if warranted to file appropriate charges against Mr. Pelaez for graft and corruption,” ang resolusyon nga gipirmahan sa 28 ka kapitan sa Lapulapu nagkanayon.