Kabanay nangisog

Nagkaanam na og kabalaka ang mga kabanay sa mga pasahero ug tripulante sa nalunod nga MV Princess of the Stars nga di na nila madali-dali nga mailhan ang dagway sa ilang mga mahal sa kinabuhi kun ugaling nga sila makit-an patay na.

Samtang nabalaka usab sila sa mga nanggawas nga di kumpirmadong report nga duna nay mga patay'ng lawas nga nabangalan sa mga mananagat sa mga hilit nga isla sa may Sibuyan Island nga gipanglubong ug ang uban gipangsunog tungod sa kabaho.

Kagahapon pipila sa mga kabanay sa mga pasahero ug tripulante ang nangisog pagdemanda sa mga representante sa Sulpicio Lines aron sila tugutang makaadto sa Manila aron ilhon ang mga patay'ng lawas.

Mihangyo usab ang uban nga ipasigurong dili hilabtan ang matag patay'ng mga lawas nga mabangalan diha sa mga hilit nga isla aron maipakita kini sa mga tagtungod.

“Ang among hangyo lang nga di sila magpataka og panglubong nga wala makit-i sa mga tagtungod,” asoy pa sa usa sa mga naghilak nga paryente sa usa ka pasahero.

Samtang kusganong nisupak ang mga kabanay sa mga pasahero nga adto sa National Bureau of Investigation sa Manila ipaawtopsiya ang mga patay'ng lawas nga matud pa sa tigpamaba ug maoy legal counsel sa Sulpicio Lines nga si Atty. Manuel Espina subay kini sa kamandoan sa ibabaw.

Sumala pa sa mga pasahero nga hasol na kaayo para kanila nga adto pa magpaabot sa Manila ug ingon man ang pagpaawtopsiya sanglit kasagaran sa kapin 800 nga mga pasahero ug tripulante pulos mga taga Cebu.

Laing kabanay ang niingon nga dili makatabang pag-ila ang NBI sa mga bata ug mga tawong walay mga record gawas lang kung sila mismo   ang makakita.

Ikaduha mao nga kung madugay na ang patay mas mosamot na nga maglisod ang NBI pag-ila kung picture ray basehan.

Usa ka C-130 Hercules cargo aircraft sa Philippine Air Force ang gikatakdang miadto kagahapon duol sa scene aron maghatud og mga bodybags, gwantes ug face mask ingon man mga formaldehyde agi’g pangandam kung maablihan na ang barko tungod sa pagtuong duna gyuy daghang patay sa sulod niini.

Kagahapon nagkauyon ang grupo nga molusad og protesta karong adlawa ug mibahad nga magdala og placards ngadto sa buhatan sa Sulpicio Lines aron mopadayag sa ilang kasagmuyo kabahin sa sitwasyon karon.

Mipasangil silang langay kaayo ang   maong kumpanya pag-atiman sa ilang mga yangungo, gihimo usab nilang kataw-anan karon ang sitwasyon nga silang mga kabanay maoy giatiman pagpakaon ug gialam-alaman samtang ang ilang mga kabanay'ng tua sa barko posibleng gigutom , nagtinga, ug gitugnaw.

“Kami na hinuoy giatiman diri ug gipakaon kadto sila (pasahero ug crew) intawon wala,” asoy pa sa usa sa mga kabanay diha sa Cebu City Sports Complex.

Pipila sa mga kabanay nga pangayuon ang katunga sa gisaad nga P200,000 nga insurance sa mga biktima aron maoy gamiton pamelete pag-adto sa kauluhan.

Apan si Espina kagahapon nagkanayon nga nagkasabot na ang kadagkoan sa Sulpicio Lines nga tugutan ang usa ka miyembro sa matag pamilya nga librehon sa expenses pag-adto sa Manila aron personal nga motan-aw sa mga patay'ng lawas.

Apan una kini himuon kinahanglang mosumitir una sila og mga impormasyon, litrato ug mga ilhanan sa ilang mga paryenteng sakay sa maong barko ug maoy iuna og dala sa Manila aron maoy basehan sa inisyal nga pag-ila sa mga patay'ng lawas.

Ug kun dunay motukma, tawgan dayon ang paryente dinhi sa Sugbu una pa kini paadtuon aron sigurohong mao ba gyud kini ang ilang nawalang kabanay.

Usa ka Santos nga Misa ang gipahinungod kagahapon nga gihimo diha sa action center  nga gitambungan sa mga kabanay sa mga tripulante ug pasahero.