Di kumpirmadong reports nakapalibog

Nagpusok-pusok ang mga impormasyon pulos may kalambigitan sa MV Princess of the Stars nga nakadugang sa kalibog sa mga kabanay sa mga tripulante ug pasaherong nag-atang niini.

Ang mga impormasyon pulos may kalambigitan sa mga na-rescue nga mga tawo, mga patay'ng lawas nga nabangalan sa mga mananagat ug mga patay'ng tawo nga nangakit-an sa mga lagyong isla nga gipanglubong nalang tungod sa kabaho.

Kining maong mga impormasyon nga nikatap pinaagi sa text ug mga report sa nagkadaiyang sources wala damhang nakadugang sa kahasol ug kabalaka sa mga kabanay.

Sa mga paborableng impormasyon nakapahupay og dyutay   sa mga kabanay apan alang niadtong wala pa gyud makadungog og nindot nga impormasyon nakapasamot kini sa ilang kabalaka.

Kagahapon, dunay impormasyong dunay mga naluwas ug nasigpatang mga patay'ng lawas sa Capiz, sa Iloilo, sa dakbayan sa Bogo, Cebu ug pipila ka dapit sa Masbate, gani pipila kanila gikatahong nangabaho na og gipanglubong na sa mga nakabangal kanila.

Apan base sa talaan sa Philippine Coast Guard kagahapon  43 palang ka tawo ang kumpirmado nilang survivors ug 12 ang patay, apan nagkanayon nga mas daghan pa gyud kini tungod kay duna pa silay nangadawat nga impormasyong gikan sa ilang mga kaubanan nga ilaha pang gikumpirmar.

Si Atty. Manuel Espina ang tigpamaba sa Sulpicio Lines kagahapon nipasabot sa mga kabanay sa mga biktima nga daghan  gyud silang nadawat nga impormasyon apan dili nila kini maisip nga tinuod kung walay kumpirmasyon sa PCG.

Matud pang Espina dunay mga pipila sa mga nakaplagang survivors dili diay gikan sa MV Princess of the Stars kundili gikan sa mga gagmay'ng panagatan nga nalunod gihapon ug diha sa palibot sa Sibuyan Island nangakaplagan.

Samtang mipasalig si Espina nga bayran gyud sa kumpanya ang mga pasahero ug tripulanteng nangakalas samtang agdon pa ang mga kabanay sa mga pasaherong makunsiderar nga missing kung moabot ang panahong sila modawat na lang nga patay na ang ilang gipangita.

Kagahapon, gisugdan na og sawom sa mga divers sa Philippine Coast Guard ang maong barko ug gihinay-hinayan na og pangita kung asa kini mahimong agion pasulod. Dunay report nga posibleng buslotan ang maong barko aron mas mapadali ang pag-ugkat sa mga naa sa sulod.